Dumun, Bali asri
Tukadé masaput taru ngrimbun
Toyané ening maglenir
Cariké andug maundag-undag
Padiné lumbung-lumbung
Ngélog kaampehang angin
Kedis pacurarit
Liang manahnyané

Ring ulunnyané
Alas madurgama
Gadang lumlum
Katumbuhin taru ageng
Daunnyané masuryak ri kala katempuh angin
Bojogé pakeraik pada girang
Pagelanting di carang kayuné

Nanging sané mangkin
Doh pisan pakantenannyané
Tukadé tanpa semu
Toyané itek masaput luwu
Taru karebah, alasé ligir
Cariké telah embid
Sapasiraké sané iwang?
Wantah I jatma sané corah

Sané mangkin, ngiring sikiang manahé
Antuk ngajegang Sad Kérthi Loka Bali
Waliang wana pinaka paparu jagat
Sané ngawetuang toya pinaka wit sarwa maurip
Dumogi sida ajeg lan lestari
Mawiguna ngantos ri wekasan
Mangda Bali mawali asri