Dumun ayuné kalintang
Ngawinang suryané makenyem girang
Sumilir angin setata ngiringang
Grudugan ombaké luwih kakatonang

Kablésan toyané ning maklening
Kadi suaran genta ning... ning... ning... ning... ning...
Nyusup budi ening
Sarining segara maklenting nyelenging

Tongos sarwa prani maurip maliang-liang
Sayan ngulangunin yéning rasayang
Segara genah nunggilang
Genah ngruruh merta sida nguripang

Jani jamanné suba matungkalik
Jadmané liu ngusak asik
Tusing rungu tekén mis plastik
Maliah, matumpuk-matumpuk, dadi cetik

Anyud, kambang, mangulayang
Nyaputin batu-batu kaang
Sarwa praniné ngeling maguyang
Nyén benehné ngrunguang?

Kija taksuné ilang?
Genah patirtané kacemerang
Tongos ngelebur lakar ngayasayang?

Jani, ingetang
Resepang
Anutang
Jalanang